Супрацоўнікі сумеснага памежнага паста на мяжы Польшчы і Германіі затрымалі беларуса, які спрабаваў уцячы ад іх на Toyota RAV-4. Як выявілася, машына была ў вышуку. За яе перагон нашаму суайчынніку паабяцалі 200 еўра, паведамляе прэс-служба польскіх памежнікаў.
На трасе А2 ля вёскі Свецка супрацоўнікі паста паспрабавалі спыніць аўтамабіль Toyota RAV-4. Але кіроўца кінуўся ўцякаць, пачалася пагоня. Праз некалькі кіламетраў пераследу з машыны выскачыў мужчына і паспрабаваў збегчы, але яго затрымалі.
Затрыманым аказаўся 36-гадовы беларус, а аўтамабіль, на якім ён ехаў, — скрадзеным у Германіі. Наш суайчыннік расказаў, што яго папрасілі перагнаць машыну з Магдэбурга ў Варшаву — у канчатковым пункце ён мусіў атрымаць 200 еўра. Дакументаў на машыну ў яго не было, ён таксама не змог апазнаць рэальнага ўладальніка Toyota. Яго затрымалі.
Кошт скрадзенага аўтамабіля ацэньваецца прыкладна ў 40 тысяч даляраў.