У Польшчы кандуктар цягніка Катавіцэ — Кракаў выклікаў паліцыю на беларуса-безбілетніка. Канфлікт скончыўся крымінальнай справай па некалькіх крымінальных артыкулах. Пра інцыдэнт расказалі ў паліцыі Малапольскага ваяводства. Увагу на паведамленне звярнула выданне MOST.
Беларуса паспрабавалі ссадзіць з цягніка ў горадзе Тшэбіня. Аднак на патрабаванні паліцэйскіх мужчына не рэагаваў і адмаўляўся назваць свае асабістыя звесткі. Казаў толькі, што грамадзянін Беларусі.
Неўзабаве 28-гадовы мужчына пачаў паводзіць сябе агрэсіўна і паспрабаваў «штурхаць паліцэйскіх». Абшукаўшы парушальніка, праваахоўнікі знайшлі ў яго торбе марыхуану. Маладога чалавека затрымалі.
Беларусу выставілі абвінавачанні ў спробе парушэння недатыкальнасці службовых асоб і захоўванні наркотыкаў. У Польшчы за гэта можа пагражаць да трох гадоў пазбаўлення волі.