Нацыянальны алімпійскі камітэт (НАК) Беларусі ўсё ж апублікаваў каментар з нагоды рашэння Міжнароднага алімпійскага камітэта (МАК) ад 8 снежня дапусціць да ўдзелу ў Алімпійскіх гульнях у Парыжы беларусаў у нейтральным статусе. Раней мы прыводзілі выказванні на рэзанансную тэму ўкраінскага і расійскага бакоў.
«Мы вітаем допуск да Гульняў у Парыжы — 2024 беларускіх спартоўцаў, аднак прынятае рашэнне не задавальняе інтарэсы беларускай спартыўнай супольнасці ў поўнай меры. Наяўныя строгія абмежаванні, уключаючы ўдзел у спаборніцтвах без нацыянальных сімвалаў, абмежаваную колькасць кваліфікацыйных спаборніцтваў, нядопуск спартоўцаў, якія выступаюць у камандных відах, — усе гэтыя ўмовы па-ранейшаму вельмі дыскрымінацыйныя што да атлетаў нашай краіны», — гаворыцца ў паведамленні.
У НАК Беларусі «перакананыя, што для захавання цэласнасці алімпійскага руху як мага хутчэйшае выкараненне любой няроўнасці ў спорце максімальна адпавядае інтарэсам самога МАК».
Акрамя таго, у НАК звярнулі ўвагу, што не ўсе міжнародныя федэрацыі «кіруюцца рэкамендацыямі і рашэннямі МАК», згадаўшы Міжнародную асацыяцыю лёгкаатлетычных федэрацый, якая нібыта праводзіць «адкрыта дыскрымінацыйную і палітызаваную пазіцыю ў дачыненні да нашых спартоўцаў».
«У сувязі з гэтым чакаем выразных тлумачэнняў „дыскрымінацыйных“ умоваў доступу да ўдзелу ў астатніх кваліфікацыйных спаборніцтвах і Алімпійскіх гульнях у Парыжы не толькі з боку МАК, але і міжнародных федэрацый як асноўных арганізатараў спаборніцтваў у сваіх відах спорту. Як заяўлялася раней, НАК Беларусі будзе кіравацца, перш за ўсё, інтарэсамі саміх спартоўцаў, а таксама, несумненна, будзе працягваць працу па аднаўленні справядлівасці і паўнавартаснага ўдзелу нашых спартоўцаў ва ўсіх спаборніцтвах», — адзначаецца ў прэс-рэлізе.
Нагадаем, у нейтральным статусе на гульні ў Парыж будуць дапушчаныя толькі індывідуальныя атлеты (то-бок ніякіх каманд) з Беларусі і Расіі, якія пройдуць кваліфікацыю ў рамках наяўных крытэраў адбору. Спартоўцы і персанал, якія «актыўна падтрымліваюць вайну», не будуць дапушчаныя да ўдзелу ў спаборніцтвах. Гэта датычыць і тых, у каго ёсць кантракт з вайсковымі арганізацыямі або органамі бяспекі. На Гульні-2024 не атрымаюць запрашэння чыноўнікі і чальцы ўрадаў. Таксама будуць забароненыя беларускі і расійскі сцягі, гімны і любое пазначэнне нацыянальнай прыналежнасці.
