Выдавецтва «Янушкевіч» больш не будзе выпускаць кнігі пра Гары Потэра на беларускай мове праз забарону праваўладальнікаў, пра гэта яно паведаміла ў сваім тэлеграм-канале.
«Гары Потэра не будзе. Мы не знайшлі ўзаемапаразумення з праваўладальнікамі. Яны не хочуць звязвацца ні з чым беларускім, пакуль Рэспубліка Беларусь пад санкцыямі. Усе нашы тлумачэнні, што мы зараз пад польскай юрысдыкцыяй, не далі выніку, мы зрабілі што маглі. Мы ацэньваем тое, што адбылося, як акт дыскрымінацыі нацыянальнай культуры. І гэта адбываецца ў Еўропе», — расказалі ў выдавецтве.
Там заклікалі звярнуць увагу на сітуацыю беларускіх дэмакратычных палітыкаў і культурных дыпламатаў:
«Гэта важная, надзённая і канкрэтная праблема. А канкрэтнай праблеме патрэбнае канкрэтнае рашэнне».
Выдавецтва паспела выпусціць на беларускай мове тры першыя серыі патэрыяны: «Гары Потэр і філасофскі камень», «Гары Потэр і таемная зала» і «Гары Потэр і вязень Азкабана». Некаторыя з іх можна набыць на сайце «Кнігаўка».
Цяпер «Янушкевіч» працуе над перавыданнем першых трох кніг пра ведзьмара Анджэя Сапкоўскага і выпускам «Уладара пярсцёнкаў. Дзве крэпасці» Джона Р. Р. Толкіна, а таксама дзіцячай кнігі «Кот Шпрот і вежавы гадзіннік» беларускай пісьменніцы Ганны Янкуты, кніг «Іншая гісторыя савецкага беларускага кіно» Вольгі Раманавай, «Вялізны цень дажджавога чарвяка» Паўла Валатовіча і Аляксея Кавалёва, «Уладар ледзянога саду. Том 3» Яраслава Гжэндовіча.
У планах выдання — выдаць па-беларуску і іншыя папулярныя творы, такія як «Дзюна» Фрэнка Герберта, «Песня лёду і полымя» Джорджа Марціна, «Імя ружы» Умберта Эка, «Завадны апельсін» Энтані Бёрджэса, «Над прорвай у жыце» Джэрома Селінджэра, «Граф Монтэ-Крыста» Аляксандра Дзюма і не толькі.
Выдавецтва абвясціла збор сродкаў у падтрымку гэтых праектаў на платформах Zrzutka і Patreon.
Чытайце таксама
