Літоўская мытня адзначае, што апошнім часам значна павялічыліся пастаўкі драўніны з Беларусі і Расіі, увоз якой у ЕС забаронены з прычыны санкцый. Пра гэта паведамляе прэс-служба літоўскага ведамства.
Падчас увозу драўніны на літоўскую мытню падаюцца дэкларацыі аб тым, што драўніна набытая ў Казахстане ці Кыргызстане. Пры гэтым, паводле інфармацыі, атрыманай у Казахстане і Кыргызстане, вываз драўніны з гэтых краін забаронены.
«З улікам афіцыйнай інфармацыі Кыргызстана і Казахстана, а таксама нелагічнасці маршруту руху гэтых тавараў, літоўская мытня будзе выкарыстоўваць узмоцнены кантроль да драўніны, якая нібыта вывозіцца з гэтых краін, і патрабаваць дадатковыя дакументы, якія пацвярджаюць яе ўвоз», — заявілі ў мытні Літвы.
Там таксама адзначылі, што яшчэ «больш прынцыпова і старанна» будуць ацэньвацца спробы ўвозу іншых забароненых санкцыямі ЕС тавараў.
Нагадаем, Еўрасаюз з 2 сакавіка ўвёў санкцыі ў дачыненні да беларускай драўніны. Яны закранулі дрэваапрацоўку пад спецыяльным кодам 44. Пры гэтым у ЕС пакінулі магчымасць выканаць да 4 чэрвеня заключаныя раней кантракты. Абмежаванні ўступілі ў поўную сілу з пачатку чэрвеня.
