Шэсць крымінальных справаў распачаў Дэпартамент фінрасследаванняў Камітэта дзяржкантролю па выніках праверкі філіялаў рэпетытарскіх цэнтраў «100 балаў». Пра гэта паведаміла 5 красавіка прэс-служба ведамства.
У прэс-рэлізе адзначаецца, што фінансавай міліцыяй была «спыненая супрацьпраўная дзейнасць» па ўхіленні ад выплаты падаткаў і абавязковых плацяжоў заснавальнікаў рэпетытарскіх цэнтраў Яўгена Лівянта і Аляксея Іванова. Абодва, нагадаем, былі затрыманыя ў пачатку года за ўдзел у пратэстах. Завялі шэсць крымінальных справаў.
Паводле КДК, Лівянт, Іваноў і яшчэ шэсць чалавек, якіх называюць «памагатымі», з 2012 года зарэгістравалі пяць юрыдычных асоб пад агульным брэндам «100 балаў», офісы якіх былі адкрытыя ў Мінску, Віцебску, Гродне, Магілёве, Полацку, Оршы, Баранавічах для аказання навучэнцам рэпетытарскіх паслуг па ўсім спектры школьнай праграмы.
«З гэтай мэтай удзельнікі групы прыцягвалі настаўнікаў і выкладчыкаў установаў адукацыі. Большасць з прыцягнутых рэпетытараў з мэтай мінімізацыі падаткаў яны рэгістравалі ў якасці індывідуальных прадпрымальнікаў (у якасці ІП было зарэгістравана больш за 180 чалавек). Пры гэтым уся дзейнасць па аказанні рэпетытарскіх паслуг ажыццяўлялася непасрэдна рэпетытарскімі цэнтрамі „100 балаў“: яны размяшчалі на сваім сайце спісы выкладчыкаў, прымалі ад бацькоў заяўкі на аказанне паслуг, складалі для выкладчыкаў расклад, давалі класы, матэрыяльна-тэхнічную базу, вызначалі адзіны прэйскурант цэн», — паведамілі ў КДК.
За паслугі бацькі вучняў таксама плацілі рэпетытарскім цэнтрам (з чэрвеня 2021 года паступіла 14,5 млн рублёў), пасля чаго цэнтры 50% атрыманых сродкаў пералічвалі ІП па фіктыўных дамовах аказання паслуг, сцвярджаюць у прэс-службе фінансавай міліцыі.
«Такім чынам выкладчыкі — індывідуальныя прадпрымальнікі фактычна былі работнікамі рэпетытарскіх цэнтраў. Рэгістрацыя іх у якасці ІП дазволіла рэпетытарскім цэнтрам выкарыстоўваць злачынную схему ўхілення ад выплаты падаткаў», — піша прэс-служба КДК.
У ведамстве таксама падкрэслілі, што з заработнай платы работнікаў-ІП не быў выплачаны падаходны падатак і ўнёскі ў ФСАН на агульную суму больш за 3,6 млн рублёў.
«Фактычна выкарыстоўвалася схема выплаты заробку „ў канверце“. Пры гэтым „заробкі“ асобных выкладчыкаў даходзілі да 13 тысяч рублёў», — сцвярджае КДК.
Па крымінальнай справе праведзеныя 23 ператрусы ў Мінскай, Віцебскай, Гродзенскай, Магілёўскай і Брэсцкай абласцях.
«Падазраваныя ў добраахвотным парадку выплачваюць нанесеную дзяржаве шкоду, цяпер у бюджэт паступіла больш за 630 тысяч рублёў», — паведамілі ў КДК.
