Аляксандр Лукашэнка 31 жніўня сабраў паседжанне Савета бяспекі. Пра гэта паведаміла яго прэс-служба.
На парадку дня — пытанні гарантавання нацыянальнай бяспекі Беларусі. Адзначаецца, што ўдзел у паседжанні бярэ міністр унутраных справаў Іван Кубракоў, а таксама кіраўнікі іншых сілавых ведамстваў.
— Краіны NATO настойліва прасоўваюць палітыку свайго пашырэння,
нарошчваюць вайсковую прысутнасць вакол Беларусі, пастаянна праводзяць правакацыйныя вучэнні на нашых межах. Свае дзеянні яны апраўдваюць нейкімі пагрозамі, што нібыта ідуць з тэрыторыі Беларусі. Кіраўніцтва Польшчы і краін Балтыі абвінавачвае Беларусь у нейкіх міфічных агрэсіўных намерах, — паведаміў Лукашэнка.
Палітык таксама заявіў, што ў красавіку Варшава «праінфармавала пра рашэнне не выконваць Дамову аб звычайных узброеных сілах у Еўропе ў дачыненні да нашай краіны».
— Гэта фактычна апошні юрыдычна абавязвальны міжнародны акт у сферы кантролю над узбраеннямі. Гэта ўжо небяспечны крок. Як мы мусім на ўсё гэта рэагаваць? — спытаў ва ўдзельнікаў паседжання Лукашэнка.
Далей ён заявіў, што гатовы да аднаўлення добрых адносін з краінамі-суседзямі.
— Як я казаў, іх не выбіраюць. Яны ад Госпада Бога. Аднак у адказ на ўсе нашыя пасылы ідуць толькі абвінавачанні і пагрозы. У пацверджанне сказанага, каб выключыць любыя інсінуацыі з гэтай нагоды, мы запрасілі прадстаўнікоў Польшчы ў якасці назіральнікаў на вучэнні АДКБ «Баявое братэрства — 2023», якія пачнуцца ўжо заўтра ў Брэсцкім рэгіёне, — адзначыў Лукашэнка.
Чытайце таксама
