Даляр на мінулым тыдні то даражэў, то таннеў на таргах на Беларускай валютна-фондавай біржы. Эксперты прагназуюць, што будзе з курсамі валют на гэтым тыдні.
Фінансавы аналітык Аляксандр Шкут лічыць, што курс беларускага рубля цяпер знаходзіцца ў збалансаваным стане, піша Office Life. Ён адзначае, што за апошнія тры тыдні не было нейкіх значных падзей, якія маглі б істотна паўплываць на яго зніжэнне або павелічэнне.
«Пры адсутнасці знешніх шокаў, хутчэй за ўсё, у найбліжэйшы тыдзень мы ўбачым каціроўкі блізу цяперашніх узроўняў. Што да курсу беларускага рубля ў перспектыве ўсяго 2024 года, мяркую, мы будзем знаходзіцца ў дыяпазоне ад 3 да 3,5 рубля за даляр», — прагназуе Аляксандр Шкут.
Фінансавы аналітык Міхаіл Грачоў адзначае, што ў першыя дні мінулага тыдня курс даляра на таргах на Беларускай валютна-фондавай біржы знізіўся да лакальнага мінімуму ў 3,1481 рубля, піша Myfin.by. Потым курс даляра крыху вырас, але ў апошні гандлёвы дзень, у пятніцу, 19 студзеня, зноў знізіўся да закрыцця тыдня на 3,1637 рубля. Па выніках тыдня даляр мінімальна вырас на +0,32%, але з пачатку года захоўваецца зніжэнне курсу на -0,43%. Дзённы гандлёвы аб’ём па даляры на мінулым тыдні быў каля 15 млн даляраў за сесію.
Міхаіл Грачоў кажа, што на гэтым тыдні на беларускім валютным рынку нейкіх істотных ваганняў абменнага курсу беларускага рубля чакаць не варта.
«Курс даляра застаецца каля цяперашніх значэнняў, магчымае мінімальнае зніжэнне ў бок 3,15 рубля. Расійскі рубель таксама каля значэнняў мінулага тыдня — 3,56 рубля за 100 расійскіх рублёў», — чакае Міхаіл Грачоў.
На яго думку, расійскі рубель, а з ім і беларуская нацыянальная валюта, будуць знаходзіцца ў зоне камфорту. «Фактары, якія падтрымліваюць рубель, застаюцца ў сіле, гэта высокія цэны нафты, адносная геапалітычная стабільнасць і падатковы перыяд, які пачынаецца ў РФ. Акрамя таго, на рынку на пастаяннай аснове прысутнічае Цэнтрабанк Расіі, які ў межах выканання бюджэтнага правіла штодня выводзіць на расійскі рынак каля 4,3 млрд рублёў у выглядзе кітайскіх юаняў», — адзначае аналітык.
Чытайце таксама
