Віншаванні з дзяржаўнымі святамі даслаў 2 снежня лідарам Лаоса і Аб’яднаных Арабскіх Эміратаў Аляксандр Лукашэнка. Тэксты тэлеграмаў апублікавала прэс-служба беларускага палітыка.
У віншаванні для прэзідэнта ААЭ Мухамеда бен Заід аль-Нахаяна Лукашэнка адзначыў, Беларусь і ААЭ «здолеюць у поўнай меры рэалізаваць наяўны патэнцыял супрацоўніцтва ў палітычнай, гандлёва-эканамічнай, інвестыцыйнай галінах і паспяхова завяршыць шэраг сумесных праектаў, працягнуць плённае ўзаемадзеянне ў рамках міжнародных фарматаў, у тым ліку БРІКС».
«Для дэталёвага абмеркавання магчымасцяў пашырэння двухбаковых адносін і надання новага імпульсу нашаму партнёрству буду рады сустрэцца з вамі найбліжэйшым часам у Абу-Дабі ці Мінску», — дадаў палітык.
У тэлеграме прэзідэнту Лаоса Тханглуну Сісуліту Лукашэнка падкрэсліў, што сяброўства Беларусі з гэтай краінай мае «аднолькавыя падыходы па прынцыповых пытаннях глабальнага і рэгіянальнага парадку дня, у тым ліку мірнага вырашэння любых канфліктаў на аснове міжнароднага права».
Ён таксама «пацвердзіў запрашэнне прэзідэнту Лаоса наведаць гасцінную Беларусь у любы зручны час для падрабязнага абмеркавання ўсіх справаў, якія ўяўляюць узаемную цікавасць для дзвюх краін».
Нагадаем, з Тханглуну Сісуліту Лукашэнка апошні раз сустракаўся 23 кастрычніка на палях саміту БРІКС у Казані (Расія). З прэзідэнтам ААЭ ён бачыўся падчас двухбаковай нефармальнай вячэры ў лістападзе ў Баку (Азербайджан), куды абодва палітыкі прыбылі для ўдзелу ў Канферэнцыі бакоў Рамкавай канвенцыі ААН пра змяненне клімату (COP29).
