Савет Рэспублікі 30 студзеня зацвердзіў законапраект «Пра спажывецкі крэдыт і спажывецкую мікрапазыку». Адно з новаўвядзенняў, якое ім хочуць укавараніць, — абавязаць вызначаць стаўкі арэнды на нерухомасць у беларускіх рублях, а не ў валюце. Далей дакумент пойдзе на подпіс Аляксандру Лукашэнку. Сенатарка Ксенія Панцюхова растлумачыла, для чаго збіраюцца ўкараніць новаўвядзенне.
Што збіраюцца змяніць
Улады хочуць прапісаць у Грамадзянскім кодэксе, што стаўкі ў дамовах арэнды можна пазначаць толькі ў беларускіх рублях. Выключэнне — лізінг. Гэта прадугледжвае законапраект «Пра спажывецкі крэдыт і спажывецкую мірапазыку», які 10 студзеня ў другім чытанні прынялі дэпутаты парламента.
Нагадаем, раней у Беларусі да канца 2024 года дзейнічала часовая забарона на прывязку арэнднай платы да замежнай валюты.
Калі арэнда дзяржаўнай нерухомасці прывязаныя ў асноўным да беларускага рубля (базавай арэнднай велічыні), то цана прыватнай нерухомасці, як правіла, раней залежала ад курсаў еўра ці даляра. На гэтым фоне чыноўнікі забаранілі вызначаць стаўкі па арэндзе камерцыйнай нерухомасці ў замежнай валюце. Іх прывязалі да беларускага рубля. Прычым гаворка пра любую маёмасць, пачынаючы ад офісных памяшканняў і машына-месцаў і заканчваючы аўтамабілямі і будаўнічай тэхнікай. Адпаведныя змены былі ўнесеныя ў Грамадзянскі і Банкаўскі кодэксы.
Для чаго хочуць укараніць новаўвядзенне
Сенатарка Ксенія Панцюхова растлумачыла, навошта збіраюцца прыняць змяненне.
«У Беларусі два гады дзейнічала забарона на прывязку ставак арэнднай платы да валюты. Толькі рубель — і кропка. Вядома, удзельнікам рынку арэнды цікава, ці падоўжаць забарону? Адказ на пытанне ўжо ёсць: забарона не проста падаўжаецца, а яшчэ і бестэрмінова. У Рэспубліцы Беларусь арэндныя стаўкі з гэтага часу не будуць прывязаныя да даляра», — заявіла яна.
Сенатарка ўдакладніла, што «цалкам падзяляе гэтае рашэнне і ў цэлым курс на мінімізацыю залежнасці ад амерыканскіх даляраў і іншых замежных валют».
«Дэвалютызацыя арэнднай платы — чарговы крок на гэтым шляху. Гэта вызваліць арандадаўцаў і арандатараў ад выдаткаў, стабілізуе сітуацыю на рынку арэнды. Упэўненая, курс гэты будзе працягнуты, канчатковым яго вынікам стане фармаванне ў Беларусі новага эканамічнага асяроддзя і новых умоваў вядзення бізнесу», — сказала сенатарка.