Міністэрства аховы здароўя загадам № 57 ад 16 студзеня зацвердзіла змены ў правілы правядзення вакцынацыі ад каранавіруса COVID-19, у тым ліку бустарных прышчэпак, вакцынацыі дзяцей і цяжарных жанчын. Дакумент апублікаваны на сайце Мінздароўя.
Загад зацвярджае новую інструкцыю пра парадак правядзення асноўнай і бустарнай вакцынацыі. Папярэдняя інструкцыя была ўведзеная 8 жніўня.
Як і раней, бустарная вакцынацыя праводзіцца праз шэсць і больш месяцаў шляхам увядзення адной дозы вакцыны. Але цяпер яе можна рабіць з узросту 5 гадоў (раней было толькі з 18 гадоў).
Раней для бустарнай вакцынацыі выкарыстоўвалі толькі вакцыны «Спутник V» і «Спутник Лайт» — любым з кампанентаў без чаргавання і незалежна ад таго, які прэпарат калолі раней. Цяпер жа для бустарнай вакцынацыі можна выкарыстоўваць любыя даступныя вакцыны, дапушчальныя да выкарыстання з улікам узросту і (супраць)паказанняў пацыента.
Раней у інструкцыі было асобна прапісана, што цяжарным жанчынам і жанчынам, якія кормяць, пры бустарнай вакцынацыі ставяць кітайскую вакцыну «Сінафарм» ці іншы прэпарат, але не «Спутник V» і «Спутник Лайт». Цяпер гэтае абмежаванне знятае.
Што ж да асноўнай (першаснай) вакцынацыі, то раней дзяцей да 18 гадоў прышчаплялі толькі «Сінафармам», цяпер жа ніякіх дадатковых абмежаванняў няма — акрамя абмежаванняў саміх прэпаратаў у адпаведнасці з іх інструкцыяй.
Акрамя таго, цяпер дазволена рабіць прышчэпку ад каранавіруса ў адзін дзень з іншымі прышчэпкамі па календары вакцынацыі і эпідпаказаннях, выконваць двухтыднёвы інтэрвал больш не трэба (толькі калі гэта не прапісана ў інструкцыі да прэпарата). Нельга сумяшчаць прышчэпку ад кавіду толькі з жывымі вакцынамі.