На мінулым тыдні стала вядома, што ў траўні са шклоўскай калоніі, дзе памёр палітвязень Вітольд Ашурак, звольнілася начмед Наталля Дабрадзярэвец. Як стала вядома «Люстэрку», Дабрадзярэвец пайшла на павышэнне.
Крыніца, знаёмая з сітуацыяй, расказала «Люстэрку», што Дабрадзярэвец пайшла на павышэнне і цяпер працуе ў ЛПП № 7 у Магілёве:
— У Шклове была начальнікам медыцынскай часткі — у Магілёве яна намесніца начальніка ўстановы па лячэбна-прафілактычнай рабоце. Там была маёрам — тут падпалкоўнік. Гэта ні з чым не звязана, яна проста пайшла на павышэнне.
У ЛПП № 7, куды журналістка «Люстэрка» патэлефанавала як жыхарка горада, пацвердзілі, што Наталля Дабрадзярэвец там працуе: «Яна кожны дзень на службе, з 8 да 17».
Суразмоўца «Люстэрка» ахарактарызаваў былога начмеда як «пісьменнага» медыка, патлумачыўшы, што «на такія пасады не бяруць людзей проста так».
— Яна добры чалавек, сумленны. І спецыяліст талковы. Такія вось абставіны склаліся там, — дадаў суразмоўца, маючы на ўвазе смерць палітвязня.
У ПК у Шклове, паводле інфармацыі «Нашай Нівы», на пасадзе начальніка рэжымнай часткі працягвае працаваць муж Дабрадзярэвец Сяргей Карчэўскі.
Нагадаем, у траўні «Альянс расследавальнікаў Беларусі» публікаваў запіс тэлефоннай размовы ад 2021 года. На ёй жаночы голас, як сцвярджаў праект, належаў Наталлі Дабрадзярэвец, а мужчынскі — палкоўніку міліцыі Аляксандру Казлову. Тады, яшчэ будучы начмедам, жанчына прасіла перавесці яе разам з мужам са Шклова ў іншае месца праз здарэнне з Ашуркам:
— Сітуацыя становіцца настолькі складанай, што нам з Сяргеем, хутчэй за ўсё, давядзецца звольніцца. Па сутнасці, адбылася сапраўдная недарэчнасць, аднак гэтая сітуацыя можа пагражаць мне поўным п******** (канцом. — Заўв. рэд.), калі я застануся. <…> У нас якраз ідзе праверка па гэтым палітвязні, і я вельмі спадзяюся, што ўсё ў выніку ўдасца загладзіць.
Паводле крыніцы «Люстэрка», пасля таго, што здарылася, у калонію прыязджалі супрацоўнікі СК, МУС і КДБ, але інфармацыя па праверцы засталася закрытай.
Нагадаем, Вітольд Ашурак — актывіст з Бярозаўкі і сябра Партыі БНФ. Яго затрымалі ў верасні 2020 года, пасля асудзілі на пяць гадоў зняволення за ўдзел у акцыях пратэсту. Пакаранне ён адбываў у шклоўскай калоніі. 21 траўня 2021 года Ашурак памёр за кратамі пры нявысветленых абставінах. Крымінальную справу па гэтым факце заводзіць не сталі. Паводле афіцыйнай версіі, ён памёр ад спынення сэрца. Родныя і паплечнікі палітвязня ўпэўненыя ў гвалтоўным характары яго смерці.
Чытайце таксама
