Экс-рэдактар NEXTA Раман Пратасевіч расказаў журналістам, што пасля выключэння са спісу тэрарыстаў будзе шукаць працу і больш канкрэтна планаваць жыццё, перадае БЕЛТА.
Паводле словаў Рамана Пратасевіча, цяпер ён спрабуе наладжваць уласнае жыццё: «Вырашыў заняцца сабой. Літаральна нядаўна даведаўся, што мяне выключылі са спісу тэрарыстаў. Гэта значыць, што ўжо цяпер я магу шукаць працу, больш канкрэтна думаць пра будучыню».
— Буду займацца пошукамі працы і паралельна ўмацоўваць здароўе. Што да сферы, у якой планую працаваць, гэта цяжкае пытанне. Я цяпер разглядаю розныя варыянты. Калі казаць зусім сумленна, то я дакладна не планую звязваць жыццё з палітыкай, — запэўніў ён. Раман Пратасевіч дадаў, што яго часта пазнаюць на вуліцах, але негатыўнага стаўлення да сябе ён не адчувае.
Як паведамлялася раней, маці Рамана Пратасевіча Наталля Пратасевіч, якая восенню 2020 года пакінула Беларусь, у сакавіку гэтага года падала зварот у камісію па вяртанні ў Беларусь і ўжо ў траўні вярнулася дадому.
Нагадаем, Раман Пратасевіч быў затрыманы 23 траўня 2021 года шляхам прымусовай пасадкі ў Мінску рэйса Ryanair Афіны — Вільнюс. Спачатку ён утрымліваўся ў СІЗА, затым быў пераведзены пад хатні арышт, пазней — пад падпіску пра нявыезд. Яго абвінавачвалі ў кіраўніцтве экстрэмісцкім фарміраваннем, распальванні варожасці, закліках да захопу ўлады і па іншых артыкулах. У траўні 2023 года суд вынес яму прысуд — 8 гадоў пазбаўлення волі. Аднак да гадавіны арышту, 22 траўня, было абвешчана, што Раман памілаваны Лукашэнкам.
Чытайце таксама
