У Гомелі маладога міліцыянта звольнілі са службы па артыкуле — за правіну, несумяшчальную з працай у органах унутраных справаў. У хлопца гэта быў першы год працы пасля Акадэміі МУС. ВНУ падала на яго ў суд і прымусіла плаціць за неадпрацаванае размеркаванне. Сума аказалася велізарнай — падрабязнасці паведамляюцца ў рашэнні суда.
Дзмітрый (імя змененае) вучыўся ў Акадэміі МУС на спецыяльнасці «правазнаўства» следча-экспертнага факультэта. ВНУ цалкам забяспечвае будучых сілавікоў — гарантуе пражыванне, харчаванне, абмундзіраванне, грашовае забяспечанне. Узамен кожны абітурыент пры паступленні бярэ абавязанне пасля выпуску адпрацаваць у МУС як мінімум пяць гадоў.
Дзмітрыя пасля заканчэння акадэміі адправілі служыць у Цэнтральнае РАУС Гомеля. Але нешта пайшло не так, і маладога чалавека звольнілі са службы за нейкую правіну, якая з’яўляецца падставай для датэрміновага скасавання кантракту. Замест 60 месяцаў ён адпрацаваў толькі дзевяць.
У выпадку звальнення міліцыянта за злачынства, невыкананне кантракту, правіну да заканчэння размеркавання ён абавязаны кампенсаваць ВНУ не толькі кошт навучання, але і ўсе астатнія выдаткі. Сума разлічваецца прапарцыйна неадпрацаванаму тэрміну кантракту.
Акадэмія МУС палічыла выдаткі на Дзмітрыя — аказалася, за чатыры гады на падрыхтоўку міліцыянта выдаткавалі 81 260 рублёў. Паколькі дзевяць месяцаў ён усё ж адпрацаваў, яму выставілі крыху меншы рахунак — на 69 071 рубель. Хлопец не кампенсаваў выдаткі добраахвотна, таму ВНУ падала супраць яго пазоў.
На паседжанні суд заканамерна прыняў бок акадэміі. Былы міліцыянт пагадзіўся з выстаўленымі яму патрабаваннямі. Ён мусіць будзе вярнуць ВНУ ўсе 69 тысяч.
Але гэтым яго запазычанасць не абмежавалася. Як з боку, які прайграў, суд спагнаў з маладога чалавека законную дзяржпошліну ў 5% ад сумы пазову — а гэта яшчэ 3453 рублі. То-бок за звальненне з міліцыі хлопцу давядзецца заплаціць 72,5 тысячы рублёў.
Чытайце таксама
