Падчас рэйду 31 кастрычніка — 1 лістапада сілавікі праводзілі затрыманні і ператрусы ў межах крымінальнай справы па артыкуле 357 КК (Змова ці іншыя дзеянні, учыненыя з мэтай захопу дзяржаўнай улады). Пра гэта паведаміў праваабарончы цэнтр «Вясна».
У рэйдах удзельнічалі супрацоўнікі КДБ. Частка затрыманых дагэтуль за кратамі. Некаторых выпусцілі на волю ў якасці сведак па крымінальнай справе.
«Вядома, што некаторым затрыманым задавалі пытанні адносна дваровых чатаў, якія былі асабліва папулярнымі ў паслявыбарчы час», — піша «Вясна».
Нагадаем, 31 кастрычніка паведамлялася пра масавыя праверкі і затрыманні ў Смаргоні і Ваўкавыску. Гаварылася таксама пра выпадкі ў Мінску, Гомелі, Маладзечне, Навагрудку і Магілёве. 1 лістапада стала вядома, што на заводзе ў Хойніках затрымалі каля 20 чалавек, але на прадпрыемстве заявілі, што ў іх «усё спакойна».
Артыкул 357 КК
1. Змова ці іншыя дзеянні, учыненыя з мэтай захопу ці ўтрымання дзяржаўнай улады неканстытуцыйным шляхам, — караюцца пазбаўленнем волі на тэрмін ад васьмі да дванаццаці гадоў са штрафам або без штрафу.
2. Захоп ці ўтрыманне дзяржаўнай улады неканстытуцыйным шляхам — караюцца пазбаўленнем волі на тэрмін ад дзесяці да пятнаццаці гадоў са штрафам або без штрафу.
3. Дзеянні, прадугледжаныя часткай другой гэтага артыкула, якія прывялі да гібелі людзей альбо спалучаныя з забойствам, караюцца пазбаўленнем волі на тэрмін ад дзесяці да дваццаці пяці гадоў са штрафам або без штрафу, або пажыццёвым пазбаўленнем волі, або смяротным пакараннем.