Паветраная трывога ў панядзелак, 5 снежня, прагучала па ўсёй тэрыторыі Украіны. Расія ажыццявіла некалькі хваляў ракетных нападаў на інфраструктуру краіны. Паведамляецца пра гібель цывільных у Запарожскай вобласці.
— У выніку ракетнай атакі ворага па вёсцы Новасафіеўка Запарожскага раёна пашкоджаныя прыватныя дамы мірных жыхароў. Паводле папярэдняй інфармацыі, двое загінулі і трое параненых (з іх — адно дзіця 2021 г. н.), — паведаміў кіраўнік мясцовай АВА Аляксандр Старух.
Прадстаўнік Паветраных сіл Украіны Юрый Ігнат у эфіры тэлемарафона расказаў, што расіяне традыцыйна запусцілі ракеты з раёна Валгадонска, Каспійскага і Чорнага мораў, піша hromadske.
Ігнат папярэдзіў, што расіяне могуць выкарыстаць некалькі хваляў нападаў, каб разгрупаваць ракеты па ўсёй тэрыторыі Украіны і заблытаць дзеянні ўкраінскай СПА.
Кіраўнік Мікалаеўскай АВА ў сваім тэлеграм-канале напісаў, што чакаюцца тры атакі.
Паведамляюць пра выбухі ў Адэсе і вобласці, а таксама ў Харкаўскай, Днепрапятроўскай, Вінніцкай, Чаркаскай, Кіеўскай абласцях, у Мікалаеве і Херсоне.
«Паветраная трывога працягваецца, Украіна перажывае восьмую масіўную ракетную атаку краіны-тэрарыста. На жаль, ужо ёсць удары па энергетычнай інфраструктуры і звязаныя з імі аварыйныя адключэнні святла. Дыспетчары „Укрэнерга“ працуюць над падтрыманнем балансу ў энергетычнай сістэме», — паведамляе кампанія ў сацыяльных сетках.
Ужо вядома, што без святла і вады засталася Адэса. У Адэскай вобласці пашкоджаныя два інфраструктурныя аб’екты, паранены цывільны, паведаміў намеснік кіраўніка Офіса прэзідэнта Кірыл Цімашэнка. Аварыйныя адключэнні па распараджэнні «Укрэнерга» адбыліся ў Чаркаскай і Сумскай абласцях. Без святла і частка Крывога Рога, інфармуе кіраўнік ваеннай адміністрацыі горада Аляксандр Вілкул.
У Кіеве цягнікі метро не спыняюцца на станцыях з вялікай колькасцю людзей, папярэдзіў мэр горада Віталь Клічко. «Жыхары і госці сталіцы выкарыстоўваюць метрапалітэн як сховішча», — нагадаў ён і заклікаў не ігнараваць сігналы паветранай трывогі.
Кіраўнік Кіеўскай АВА Аляксей Кулеба паведаміў аб прафесійнай працы СПА ў вобласці.
Між тым Sputnik Moldova са спасылкай на МУС краіны піша, што памежнікі недалёка ад горада Брычаны знайшлі прадмет, падобны да ракеты. Тэрыторыя ачэпленая паліцэйскім патрулём і памежнікамі, чакаюць супрацоўнікаў спецыялізаваных службаў. Прыналежнасць ракеты не ўдакладняецца.
Нагадаем, з 10 кастрычніка Расія наносіць удары па энергетычнай сістэме Украіны.
У сераду, 23 лістапада, РФ выпусціла па Украіне 67 крылатых ракет Х-101/Х-555 «Калібр». Пацярпела мірнае насельніцтва: загінула 10 чалавек, у тым ліку 17-гадовая дзяўчына. Параненых — больш за трыццаць. На ўсіх украінскіх АЭС праз абстрэлы былі аварыйна спыненыя энергаблокі. Практычна ўсе рэгіёны краіны засталіся без святла, ацяплення і вады. Наступствы таго абстрэлу да канца так і не былі ліквідаваныя.
