Расія ноччу правяла 81 пуск ракет рознага базавання і восем пускаў ударных БПЛА Shahed-136/131. Праз удар па энергасістэме Украіны на некалькі гадзін цалкам абясточанай аказалася Запарожская АЭС, тры цеплаэлектрастанцыі былі пашкоджаныя, паведамляюць адпаведныя ведамствы. Загінулі прынамсі шэсць чалавек.
Як паведамляе ўкраінскі Энергаатам, у выніку ракетных абстрэлаў адключылася апошняя лінія сувязі Запарожскай АЭС з энергасістэмай Украіны.
— Цяпер станцыя абясточаная і перайшла ў рэжым блэкаўту шосты раз за час акупацыі, 5-ы і 6-ы энергаблокі пераводзяцца ў халодны стан, уключыліся 18 дызель-генератараў для забяспечання ўласных патрэбаў ЗАЭС. Паліва для іх працы застаецца на 10 сутак. Пачаўся зваротны адлік часу, — паведамілі падрабязнасці ў ведамстве.
У Энергаатаме адзначаюць, што, калі за гэты час не адновіцца знешняе сілкаванне станцыі, можа адбыцца аварыя з радыяцыйнымі наступствамі для ўсяго свету. Там нагадваюць, што з прычыны акупацыі станцыі магчымасці ўкраінскага боку ў падтрыманні ЗАЭС у рэжыме бяспекі значна абмежаваныя.
Міністр энергетыкі Украіны Герман Галушчанка заявіў, што, паводле звестак на раніцу 9 сакавіка, зафіксаваныя абстрэлы энергетычных аб’ектаў у Кіеўскай, Мікалаеўскай, Харкаўскай, Запарожскай, Адэскай, Днепрапятроўскай і Жытомірскай абласцях.
Паводле ДТЭК, у выніку абстрэлаў пацярпелі тры цеплаэлектрастанцыі, іх абсталяванне сур’ёзна пашкоджанае.
— З верасня мінулага года ТЭС ДТЭК былі атакаваныя ўжо 29 разоў. Праз гэта тры энэргетыкі загінулі, 28 былі параненыя, — расказалі ў кампаніі.
UPD: Пасля 16.00 ва «Укрэнерга» паведамілі, што электразабяспечанне Запарожскай АЭС, перапыненае ракетнымі ўдарамі, адноўленае. Станцыя пераходзіць з дызельных генератараў на атрыманне электраэнергіі для ўласных патрэбаў ад адзінай энергетычнай сістэмы Украіны.
Ракеты і «Шахеды»
Галоўнакамандуючы УСУ Валерый Залужны паведаміў, што падчас ракетнага ўдару па аб’ектах крытычнай інфраструктуры Украіны Расія ажыццявіла 81 пуск ракет рознага базавання:
- 28 пускаў крылатых ракет паветранага базавання Х-101/Х-555;
- 20 пускаў крылатых ракет марскога базавання «Калібр»;
- 6 пускаў крылатых ракет паветранага базавання X-22;
- 6 пускаў крылатых ракет паветранага базавання Х-47 «Кінжал»;
- 8 пускаў кіравальных авіяцыйных ракет: 2 — Х-31П; 6 — X-59;
- 13 пускаў зенітных кіравальных ракет С-300.
Таксама ажыццявілі восем пускаў ударных БПЛА Shahed-136/131.
З 48 крылатых ракет Х-101/Х-555, «Калібр» знішчаныя 34 крылатыя ракеты, а таксама 4 БПЛА Shahed-136/131.
— Акрамя таго, у выніку арганізаванага процідзеяння 8 кіравальных авіяцыйных ракет Х-31П і Х-59 не дасягнулі сваіх цэляў, — расказаў Залужны.
«Цяжкая ноч»
Відэа: Пасля падзення абломкаў ракеты ў Святошынскім раёне Кіева загарэлася некалькі аўто, «Суспільне»
Паветраная трывога была абвешчаная каля гадзіны ночы 9 сакавіка і доўжылася амаль 7 гадзін. У Залачоўскім раёне на Львоўшчыне пасля трапляння ракеты ў жылы раён пяць чалавек загінулі, у Днепрапятроўскай вобласці — адзін загінулы і двое параненых.
У Кіеве праз падзенне абломкаў ракеты пацярпелі і шпіталізаваныя два чалавекі. У Харкаве таксама двое траўмаваных.
Сур’ёзныя праблемы з электразабяспечаннем назіраюцца ў Харкаўскай, Адэскай і Жытомірскай абласцях.
Прэзідэнт Украіны Уладзімір Зяленскі назваў мінулую ноч цяжкай.
— Масіраваная ракетная атака па ўсёй краіне. Кіеў, Кіраваградчына, Днепрапятроўшчына, Адэшчына, Харкаўшчына, Запарожжа, Львоўшчына, Івана-Франкоўшчына, Жытоміршчына, Вінніччына. Атакі на аб’екты крытычнай інфраструктуры, жылыя дамы. На жаль, ёсць пацярпелыя і загінулыя. Мае спачуванні родным, — напісаў ён у сваім тэлеграм-канале.
Зяленскі таксама падзякаваў «абаронцам неба і тым, хто дапамагае пераадольваць наступствы падступных атак акупантаў».
