У Міністэрстве абароны Расіі заявілі, што самыя жорсткія баі вядуць на заходняй ускраіне Бахмута і ў раёне населенага пункта Краснае Данецкай вобласці. Ва ўкраінскім Генштабе паведамілі, што на Ліманскім, Бахмуцкім, Аўдзееўскім і Мар'інскім напрамках за мінулыя суткі адбылося 46 баявых сутыкненняў. У амерыканскім Інстытуце па вывучэнні вайны расказалі пра новую стратэгію Расіі па нанясенні паветраных удараў па Украіне.
Расказваем пра галоўнае са зводак штабоў і высноваў экспертаў на 446-ы дзень вайны ва Украіне.
Генштаб УСУ: Нанеслі ўдары па сямі важных цэлях расійскіх войскаў
За мінулыя суткі расійскія войскі нанеслі 11 ракетных, 41 авіяцыйны ўдар і правялі 74 абстрэлы з рэактыўных сістэм залпавага агню па пазіцыях украінскіх войскаў і населеных пунктах. У прыватнасці, па гарадах Харкаў, Канстанцінаўка і пасёлку Золачаў. Пацярпелі мірныя людзі, разбураныя і пашкоджаныя жылыя дамы і іншая цывільная інфраструктура. Пра гэта паведамляе Генштаб УСУ ў ранішняй зводцы.
— Праціўнік працягвае засяроджваць асноўныя намаганні на Ліманскім, Бахмуцкім, Аўдзееўскім і Мар'інскім напрамках. Тут адбылося 46 баявых сутыкненняў. У эпіцэнтры баявых дзеянняў застаюцца Бахмут і Мар'інка.
— На Северскім і Слабажанскім напрамках расійскія войскі з мінамётаў і артылерыі абстралялі восем населеных пунктаў Чарнігаўскай, Сумскай і Харкаўскай абласцей.
— На Купянскім напрамку расійскія сілы вялі беспаспяховыя наступальныя дзеянні ў раёнах Масютаўкі і Сінькоўкі. Нанеслі авіяўдары па раёнах двух населеных пунктаў. Артылерыйскім і мінамётным абстрэлам праціўніка падвергліся дзесяць населеных пунктаў.
— На Ліманскім напрамку праціўнік наступальных дзеянняў не праводзіў. Нанёс авіяцыйныя ўдары па раёнах пяці населеных пунктаў. Артылерыйскім абстрэлам падвергліся таксама пяць населеных пунктаў Луганскай і Данецкай абласцей.
— На Бахмуцкім напрамку працягваюцца цяжкія баі за Бахмут. Цягам сутак расійскія войскі вялі беспаспяховыя наступальныя дзеянні ў напрамку населеных пунктаў Грыгораўка, Багданаўка і Прадцечына. Авіяўдары нанесеныя па раёнах двух населеных пунктаў, ад абстрэлаў пацярпелі Бахмут і яшчэ дзесяць населеных пунктаў.
— На Аўдзееўскім напрамку расіяне нанеслі авіяцыйныя ўдары ў раёнах Новакалінава і Аўдзееўкі, абстралялі сем населеных пунктаў.
— На Мар'інскім напрамку падраздзяленні Сіл абароны адбілі шматлікія атакі ў раёне горада Мар'інка. Абстрэлам падвергліся чатыры населеныя пункты.
— На Шахцёрскім напрамку за мінулыя суткі праціўнік наступальных дзеянняў не праводзіў. Абстраляў Вуглядар і яшчэ два населеныя пункты.
— На Запарожскім і Херсонскім напрамках расійскія войскі працягваюць весці абарончыя дзеянні. Нанеслі авіяцыйныя ўдары ў раёнах населеных пунктаў Кізамыс і Станіслаў Херсонскай вобласці. Абстралялі каля 40 населеных пунктаў Данецкай, Запарожскай, Днепрапятроўскай і Херсонскай абласцей, а таксама горад Херсон.
— Авіяцыя Сіл абароны за суткі нанесла 17 удараў па раёнах канцэнтрацыі асабовага складу і ваеннай тэхнікі праціўніка.
— Збітыя два разведвальныя БПЛА тыпу «Арлан-10» і адзін Supercam.
— Падраздзяленні ракетных войскаў і артылерыі пабілі пункт кіравання, шэсць раёнаў канцэнтрацыі жывой сілы, чатыры артылерыйскія падраздзяленні на агнявых пазіцыях, сродак супрацьпаветранай абароны і яшчэ сем важных цэляў расійскіх войскаў.
У Генштабе заяўляюць, што расійскія войскі спрабуюць папаўняць страты ў жывой сіле за кошт прымусовай мабілізацыі на акупаваных тэрыторыях Украіны. Так, у шэрагу населеных пунктаў Херсонскай вобласці адзначаюцца факты гвалтоўнага затрымання мужчын, якія раней атрымалі расійскія пашпарты. Ад іх патрабуюць грашовай узнагароды за адтэрміноўку ад мабілізацыі. Тых, хто адмаўляецца плаціць, адпраўляюць у палявыя лагеры для праходжання паскоранага курсу агульнавайсковай падрыхтоўкі.
Мінабароны РФ: Спынілі дзеянні пяці ўкраінскіх ДРГ
У Мінабароны Расіі заявілі, што ў Данецкай вобласці збілі верталёты Мі-24 і Мі-8 Паветраных сіл Украіны.
— На Купянскім напрамку ўдарамі авіяцыі і агнём артылерыі Заходняй групоўкі войскаў пабітыя падраздзяленні УСУ ў раёнах населеных пунктаў Бераставое і Сінькоўка Харкаўскай вобласці. У раёне населенага пункта Двурэчнае Харкаўскай вобласці спыненыя дзеянні трох дыверсійна-разведвальных груп.
Страты УСУ за суткі на гэтым напрамку склалі да 145 вайскоўцаў, дзве баявыя браніраваныя машыны, тры аўтамабілі, дзве самаходныя артылерыйскія ўстаноўкі «Гваздзік», а таксама гаўбіца Д-20.
— На Чырвона-Ліманскім напрамку авіяцыяй і артылерыяй групоўкі войскаў «Цэнтр» нанесенае паражэнне жывой сіле і тэхніцы УСУ ў раёне населенага пункта Неўскае Луганскай вобласці. У раёне населенага пункта Чырвоная Дзіброва Луганскай вобласці ліквідаваныя дзве дыверсійна-разведвальныя групы. За суткі знішчаныя больш за 75 украінскіх вайскоўцаў, дзве баявыя браніраваныя машыны, тры пікапы, адна самаходная артылерыйская ўстаноўка «Гваздзік», а таксама гаўбіца Д-30.
— На Данецкім напрамку найбольш жорсткія баі працягвалі весці штурмавыя атрады на заходняй ускраіне Бахмута, а таксама падраздзяленні 4-й мотастралковай брыгады ў раёне населенага пункта Краснае Данецкай вобласці. Ударамі авіяцыі, агнём артылерыі Паўднёвай групоўкі войскаў пабітыя падраздзяленні УСУ ў раёнах населеных пунктаў Часаў Яр і Багданаўка Данецкай вобласці. Страты ўкраінскіх сіл за суткі склалі да 235 вайскоўцаў і добраахвотнікаў, адзін танк, чатыры баявыя браніраваныя машыны, сем аўтамабіляў, а таксама гаўбіцы Д-20, Д-30 і «Мста-Б».
— На Паўднёва-Данецкім і Запарожскім напрамках ударамі авіяцыі і агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Вадзяное і Вуглядар Данецкай вобласці. Страты УСУ склалі звыш 150 вайскоўцаў, а таксама пяць аўтамабіляў.
— На Херсонскім напрамку ў выніку агнявога паражэння цягам сутак знішчаныя да 30 украінскіх вайскоўцаў, баявая браніраваная машына, а таксама чатыры аўтамабілі.
Усяго за суткі, паводле МА РФ, пабітыя 68 артылерыйскіх падраздзяленняў, жывая сіла і ваенная тэхніка УСУ ў 97 раёнах. Знішчаная радыёлакацыйная станцыя контрбатарэйнай барацьбы AN/TPQ-37. Перахопленыя сем супрацьрадыёлакацыйных ракет HARM, адна крылатая ракета вялікай далёкасці Storm Shadow, а таксама дзесяць рэактыўных снарадаў сістэм залпавага агню HIMARS. Знішчаны 21 украінскі беспілотны лётны апарат.
Інстытут па вывучэнні вайны: Мінабароны РФ спрабуе адцягнуць увагу ад нядаўніх поспехаў Украіны пад Бахмутам
Расійскія беспілотныя і ракетныя ўдары па Украіне робяцца ўсё больш рэгулярнымі. Імаверна, гэта частка новай расійскай стратэгіі, скіраванай на зніжэнне здольнасці ўкраінцаў весці контрнаступальныя аперацыі ў найбліжэйшай перспектыве. Пра гэта гаворыцца ў свежай справаздачы амерыканскага Інстытута па вывучэнні вайны (ISW).
Эксперты адзначаюць, што з 19 красавіка расійскія войскі нанеслі не менш за 10 серый удараў па ўсёй Украіне, асабліва па тылавых раёнах. Пры гэтым Расія выкарыстала значна менш высокадакладных ракет у параўнанні з няўдалай кампаніяй па крытычна важнай інфраструктуры Украіны з восені 2022 года да зімы 2023 года. Імаверна, Расія спрабуе захаваць вычарпаныя запасы, больш спадзеючыся на іранскія беспілотнікі, мяркуюць у ISW.
Новая расійская паветраная кампанія, падобна, сканцэнтраваная на Кіеве і магчымых ваенна-прамысловых і лагістычных аб’ектах ва ўкраінскім глыбокім тыле. ISW раней ацэньваў, што расійскія сілы могуць спрабаваць наносіць амаль штодзённыя серыі удараў, каб паказаць, што паспяхова стрымліваюць патэнцыйныя блізкія ўкраінскія контрнаступальныя аперацыі. Меркаваныя мэты і абмежаваны характар гэтай кампаніі паказваюць на тое, што расійскія сілы занепакоеныя цяперашнімі магчымасцямі Украіны па правядзенні контрнаступальных аперацый.
14 мая ўкраінскія сілы працягнулі контрнаступленне ў раёне Бахмута. Намесніца міністра абароны Ганна Маляр паведаміла, што цягам дня 14 траўня ўкраінскія войскі захапілі больш за дзесяць расійскіх пазіцый на паўночнай і паўднёвай ускраінах горада. Расійскія блогеры сцвярджалі, што ўкраінскія войскі атакавалі Бярхоўку, Кляшчэеўку і Курдзюмаўку, занялі новыя неназваныя пазіцыі паблізу населеных пунктаў і дадаткова прасунуліся ў кірунку Ягаднага з боку Багданаўкі. Аднак Яўген Прыгожын заявіў, што ў ноч з 13 на 14 траўня ўкраінскія сілы не наносілі ніякіх удараў. У ISW адзначаюць, што візуальнага пацверджання таму, што Украіна заняла новыя пазіцыі вакол Бахмута, не назіралі. Разам з тым эксперты звяртаюць увагу на заяву афіцыйнага прадстаўніка ўсходняй групы войскаў Украіны палкоўніка Сяргея Чараватага, што галоўная мэта ў Бахмуце — знішчыць раёны канцэнтрацыі расійскіх сіл і акружыць горад, а не весці лабавыя штурмы.
Міністэрства абароны Расіі спрабуе адцягнуць увагу ад нядаўніх поспехаў Украіны пад Бахмутам, усхваляючы абарончыя дзеянні расійскіх сіл супраць украінскіх контратак, кажуць у Інстытуце. Там звяртаюць увагу на заявы Мінабароны РФ пра тое, што расійскія войскі адбілі ўсе ўкраінскія контратакі на рубяжы Салядар — Бахмут, і распаўсюджаныя кадры ўзнагароджанняў расійскіх вайскоўцаў.
На што яшчэ звярнулі ўвагу эксперты:
- расійскія войскі нанеслі наземныя ўдары на паўночны ўсход ад Купянска і на мяжы Купянск — Сватава;
- расійскія сілы не дамагліся дадатковых пацверджаных поспехаў у раёне Бахмута і працягвалі абмежаваныя наступальныя аперацыі на лініі Аўдзееўка — Данецк;
- расійскія сілы працягвалі абстрэльваць раёны на захад ад Гуляйполя на поўдні Украіны;
- расійскія сілы працягваюць намаганні па папаўненні стратаў жывой сілы за кошт зняволеных;
- расійскія афіцыйныя асобы і акупацыйныя ўлады працягваюць падрыхтоўку да выбараў, якія плануюцца ў верасні 2023 года на акупаваных тэрыторыях.