У Міністэрстве абароны Расіі заявілі, што сарваная атака УСУ на Аляксандра-Каліноўскім напрамку. Ва ўкраінскім Генштабе паведамілі, што расійскія войскі не былі гатовыя да наступстваў падрыву плаціны Кахоўскай ГЭС. У амерыканскім Інстытуце па вывучэнні вайны адзначаюць, што разбурэнне плаціны Кахоўскай ГЭС істотна мяняе лінію фронту на херсонскім участку.
Расказваем пра галоўнае са зводак штабоў і высноваў экспертаў на 470-ы дзень вайны ва Украіне.
Генштаб УСУ: Нанеслі ўдары па чатырох пунктах кіравання расійскіх войскаў
За мінулыя суткі расійскія войскі нанеслі пяць ракетных і 48 авіяцыйных удараў, правялі 70 абстрэлаў з рэактыўных сістэм залпавага агню. Разбураная інфраструктура, пацярпела мірнае насельніцтва, паведамляе Генштаб УСУ ў ранішняй зводцы.
— Расійскія войскі працягваюць канцэнтраваць асноўныя намаганні на спробах поўнай акупацыі Луганскай і Данецкай абласцей. За мінулыя суткі тут адбылося 30 баявых сутыкненняў.
— На Северскім і Слабажанскім напрамках праціўнік нанёс авіяцыйны ўдар у раёне Стралечай Харкаўскай вобласці. Абстраляў 21 населены пункт у Чарнігаўскай, Сумскай абласцях і на Харкаўшчыне.
— На Купянскім напрамку расійскія войскі нанеслі авіяцыйныя ўдары ў раёне Кіслоўкі Харкаўскай вобласці і Стальмахоўкі Луганскай вобласці. Артылерыйскім і мінамётным абстрэлам праціўніка падвергліся 13 населеных пунктаў.
— На Ліманскім напрамку армія РФ вяла беспаспяховыя наступальныя дзеянні ў раёне Вясёлага Данецкай вобласці. Нанесла авіяцыйныя ўдары ў раёнах дзевяці населеных пунктаў Данецкай вобласці, абстраляла — сем.
— На Бахмуцкім напрамку расійскія войскі вялі наступальныя дзеянні ў кірунках Арэхава-Васільеўкі, Іванаўскага і Севернага, поспеху не мелі. Нанеслі авіяўдары ў раёнах Дыліеўкі і Белай Гары Данецкай вобласці. З артылерыі абстралялі 10 населеных пунктаў Данецкай вобласці.
— На Аўдзееўскім напрамку праціўнік здзейсніў няўдалую спробу наступу ў кірунку населеных пунктаў Аўдзееўка і Першамайскае. Нанёс авіяўдары ў раёне Аўдзееўкі. З артылерыі абстраляў раёны пяці населеных пунктаў Данецкай вобласці.
— На Мар'інскім напрамку УСУ адбілі шматлікія расійскія атакі ў раёне Мар'інкі, нанёсшы праціўніку значныя страты. Расійская авіяцыя нанесла ўдары па Краснагораўцы, артылерыя абстраляла сем населеных пунктаў Данецкай вобласці.
— На Шахцёрскім напрамку праціўнік нанёс авіяцыйныя ўдары ў раёнах Прачыстаўкі, Залатой Нівы, Шахцёрскага, абстраляў чатыры населеныя пункты Данецкай вобласці.
— На Запарожскім і Херсонскім напрамках расійскія войскі працягваюць весці абарончыя дзеянні. Нанеслі авіяцыйныя ўдары ў раёнах трох населеных пунктаў, з артылерыі абстралялі 19 населеных пунктаў Данецкай, Запарожскай, Днепрапятроўскай і Херсонскай абласцей і горада Херсон.
— Авіяцыя Сіл абароны нанесла 23 удары па раёнах канцэнтрацыі асабовага складу і чатыры — па зенітна-ракетных комплексах расійскіх сіл.
— Знішчаныя чатыры разведвальныя БПЛА праціўніка.
Падраздзяленні ракетных войскаў і артылерыі цягам сутак пабілі чатыры пункты кіравання, дзевяць раёнаў канцэнтрацыі жывой сілы, узбраення і ваеннай тэхнікі, пяць складоў боепрыпасаў, два зенітна-ракетныя комплексы і радыёлакацыйную станцыю расійскіх войскаў.
У Генштабе адзначылі, што расійскія войскі не былі гатовыя да наступстваў падрыву плаціны Кахоўскай ГЭС, панеслі страты ў жывой сіле, узбраенні і ваеннай тэхніцы.
«У прыватнасці, у падраздзяленнях 7-й дэсантна-штурмавой дывізіі і 22-м армейскім корпусе УС РФ ёсць траўмаваныя, загінулыя і зніклыя без вестак», — заявілі ў Генштабе. Там таксама паведамілі, што былі затопленыя некалькі палявых складоў з боепрыпасамі і правізіяй, аўтамабільная і бранятанкавая тэхніка, іншая ваенная маёмасць названых падраздзяленняў. Эвакуюючыся з затопленай Кахоўкі, расійскія салдаты ў якасці жывога шчыта выкарыстоўвалі мясцовае насельніцтва, заявілі ва ўкраінскім Генштабе.
Мінабароны Расіі: Знішчылі два рэактыўныя снарады HIMARS
— На Купянскім напрамку разведкай групоўкі войскаў «Захад» выкрытае перамяшчэнне ваеннай тэхнікі 102-й асобнай брыгады тэрытарыяльнай абароны. Акрамя таго, сарваныя дзве спробы ратацыі падраздзяленняў УСУ на перадавых пазіцыях, а таксама знішчаная дыверсійна-разведвальная група і два мінамётныя разлікі, адна БМП, рэактыўная ўстаноўка «Град» і разведвальны БПЛА «Эльф».
— Штурмавой авіяцыяй Паўднёвай групоўкі войскаў нанесеныя ўдары па месцах канцэнтрацыі жывой сілы праціўніка ў раёнах населеных пунктаў Спірнае, Вясёлае, Курдзюмаўка. Сарваная адна атака УСУ на Аляксандра-Каліноўскім напрамку. Нанесенае паражэнне апорным пунктам 24-й асобнай механізаванай брыгады УСУ ў раёне вёсак Кірава і Дружба. Знішчаныя гаўбіцы Д-20 і Д-30, самаходная артустаноўка «Гваздзік», збітыя два разведвальныя беспілотныя лётныя апараты «Лялека 100».
— На Чырвона-Ліманскім напрамку ў раёнах населеных пунктаў Неўскае і Чырвонапапоўка падраздзяленнямі групоўкі войскаў «Цэнтр» сарваная ратацыя асабовага складу 66-й механізаванай брыгады і 25-й паветрана-дэсантнай брыгады ўкраінскіх войскаў. У раёне Серабранскага лясніцтва пабітыя пазіцыі 67-й механізаванай брыгады УСУ.
СПА знішчылі два рэактыўныя снарады HIMARS, а таксама беспілотныя лётныя апараты УСУ ў раёне населенага пункта Крамянная.
— На Паўднёва-Данецкім напрамку перадавымі падраздзяленнямі групоўкі «Усход» пры падтрымцы артылерыі і авіяцыі нанесенае агнявое паражэнне праціўніку, які спрабуе весці наступальныя дзеянні. Знішчаныя пяць танкаў, 15 бронеаўтамабіляў, тры пікапы, пяць грузавых аўтамабіляў, гаўбіца М777 УСУ, самаходная артылерыйская ўстаноўка Krab, беспілотны лётны апарат «Фурыя».
— На Запарожскім напрамку агнём артылерыі знішчаныя пікап і жывая сіла ў раёне Малой Такмачкі, апорныя пункты УСУ ў Малых Шчарбаках, Новаандрэеўцы, Стэпавым. Збітыя тры беспілотныя лётныя апараты «Валькірыя», «Фурыя» і «Лялека».
Усяго за ўчорашнія суткі УСУ страцілі 945 чалавек асабовага складу, 33 танкі, 28 баявых машын пяхоты, 38 баявых браніраваных машын, тры самаходныя артылерыйскія ўстаноўкі Krab і іншыя ўзбраенні, заявіў міністр абароны Сяргей Шайгу.
Інстытут па вывучэнні вайны: Некаторыя населеныя пункты на правым беразе сталі недасягальнымі для расійскай артылерыі
Разбурэнне плаціны Кахоўскай ГЭС істотна мяняе лінію фронту на херсонскім участку. Пра гэта гаворыцца ў свежай справаздачы амерыканскага Інстытута па вывучэнні вайны.
Здымкі, зробленыя ў 04.00 паводле ўсходнееўрапейскага часу 7 чэрвеня, сведчаць, што паводка моцна разбурае расійскія абарончыя пазіцыі на ўсходнім (левым) беразе Дняпра. Асабліва пацярпела першая лінія абароны ў Голай Прыстані і Алешках, паведамляюць эксперты. Хуткая паводка, імаверна, вымусіла расійскіх салдат, якія там знаходзіліся, і ваенную тэхніку адступіць. Расійскія войскі раней выкарыстоўвалі гэтыя пазіцыі для абстрэлу Херсона і іншых населеных пунктаў на правым беразе Дняпра.
Прэс-сакратар Паўднёвага аператыўнага камандавання Украіны Наталля Гумянюк заявіла, што Мінабароны РФ перадыслакавала свой асабовы склад і ваенную тэхніку на адлегласць ад 5 да 15 кіламетраў ад зоны затаплення, дзякуючы чаму па-за дасяжнасцю расійскай артылерыі аказаліся некаторыя населеныя пункты на правым беразе. Паводка таксама знішчыла расійскія мінныя палі ўздоўж узбярэжжа, на кадрах відаць, як міны выбухаюць у вадзе паводкі. Колькасць расійскай цяжкай тэхнікі, страчанай за першыя суткі затаплення, пакуль незразумелая, адзначаюць у Інстытуце.
У ISW не выключаюць, што цягам наступных 72 гадзін паводка яшчэ больш зменіць геаграфію пазіцый у Херсонскай вобласці.
Эксперты таксама адзначаюць, што каментары расійскіх ваенных блогераў з нагоды падрыву дамбы Кахоўскай ГЭС сведчаць, што ў расійскай інфармацыйнай прасторы існуе страх што да ўкраінскага контрнаступлення і вера ў тое, што яно непазбежнае ці ўжо пачалося.
ISW таксама адзначае, што расійскія войскі і акупацыйныя ўлады рэагуюць на паводку ў захопленых раёнах Херсонскай вобласці вельмі неарганізавана, што яшчэ больш павялічвае шкоду ад катастрофы для цывільнага насельніцтва гэтых тэрыторый. Аналітыкі адзначаюць, што заявы акупацыйных уладаў пра тое, што на пацярпелых тэрыторыях ідзе актыўная эвакуацыя, супярэчаць сцверджанням украінскага боку і неафіцыйным сведчанням мясцовых жыхароў. Так, украінскі Генштаб паведаміў, што расійскія вайскоўцы, нягледзячы на паводку, не давалі выехаць мясцовым жыхарам, якія спрабавалі ратавацца. Дарадца Херсонскай абласной адміністрацыі Украіны Сяргей Хлань заявіў, што жыхары населеных пунктаў усходняга берага без ежы і вады чакаюць на сваіх дахах, што акупацыйная адміністрацыя акажа дапамогу і эвакуюе іх, а расійскія салдаты пакінулі свае пазіцыі і ўцяклі.
У Інстытуце таксама звярнулі ўвагу на публікацыю ў The New York Times (NYT), у якой са спасылкай на спецыялістаў гаворыцца, што наўмысны выбух быў імавернай прычынай абвальвання плаціны Кахоўскай ГЭС 6 чэрвеня. І што мэтаскіраваных ракетных або артылерыйскіх удараў недастаткова для прарыву плаціны.
На што яшчэ звярнулі ўвагу эксперты:
- расійскія і ўкраінскія афіцыйныя асобы абвінавацілі адно аднаго ў пашкоджанні аміякаправода, які праходзіць праз Харкаўскую вобласць, што прывяло да ўцечкі аміяку;
- расійскія войскі працягвалі наносіць наземныя ўдары ў раёне Крамянной;
- украінскія афіцыйныя асобы адзначылі, што ўкраінскія сілы вядуць наступальныя аперацыі на Бахмуцкім напрамку па стане на 7 чэрвеня;
- расійскія сілы працягвалі абмежаваныя наземныя атакі ўздоўж лініі Аўдзееўка — Данецк;
- расійскія крыніцы працягвалі сцвярджаць, што 7 чэрвеня ўкраінскія сілы нанеслі наземныя ўдары па адміністрацыйнай мяжы паміж Данецкай і Запарожскай абласцямі;
- паведамляецца, што расійскія і ўкраінскія сілы ўступілі ў перастрэлку на захадзе Запарожскай вобласці;
- расійскія афіцыйныя асобы і акупацыйныя ўлады працягваюць уводзіць праграмы патранажу паміж расійскімі рэгіёнамі і акупаванымі тэрыторыямі з мэтай інтэграцыі акупаваных тэрыторый у склад Расіі.