Украінскія вайскоўцы паведамілі, што за мінулыя суткі СПА знішчыла 23 дроны. У Мінабароны РФ заявілі, што занялі больш выгадныя пазіцыі ў некалькіх раёнах і палепшылі становішча па пярэднім краі на адным з напрамкаў. Ваенная разведка Вялікабрытаніі назвала адзін з фактараў запавольвання контрнаступу ўкраінскіх войскаў і павольнага развіцця баявых дзеянняў. Пераказваем галоўнае са зводак штабоў і высноваў экспертаў на 526-ы дзень вайны.
Генштаб УСУ: Адбыліся 44 баі, знішчаныя 23 дроны
«Уначы РФ нанесла чарговы ўдар іранскімі ўдарнымі БПЛА тыпу Shahed па Украіне. Украінская СПА знішчыла 23 дроны», — расказалі ў Генштабе УСУ.
За суткі расійскія войскі нанеслі пяць ракетных і 89 авіяцыйных удараў, здзейснілі 67 абстрэлаў з рэактыўных сістэм залпавага агню па пазіцыях УСУ і населеных пунктах. За мінулыя суткі адбылося 44 баявыя сутыкненні.
- На Северскім і Слабажанскім напрамках праціўнік нанёс авіяцыйныя ўдары ў раёнах Волфина, Стэпавага Сумскай вобласці і Казачай Лопані Харкаўскай вобласці. Ажыццявіў мінамётныя і артылерыйскія абстрэлы больш за 25 населеных пунктаў.
- На Купянскім напрамку вораг нанёс авіяцыйныя ўдары ў раёнах Петрапаўлаўкі, Іванаўкі і Кіслоўкі. Артылерыйскім і мінамётным абстрэлам праціўніка падвергліся Каменка, Двурэчная, Заходняе, Навамлынск, Фігалеўка, Кандрашоўка, Чырвонае Першае і Купянск Харкаўскай вобласці.
- На Ліманскім напрамку праціўнік нанёс авіяцыйныя ўдары ў раёнах Белагораўкі Луганскай вобласці, а таксама Серабранкі і Спірнога Данецкай вобласці.
- На Бахмуцкім напрамку вораг распачаў беспаспяховыя спробы аднавіць страчанае становішча на захад ад Курдзюмаўкі, на поўдзень ад Андрэеўкі і на захад ад Данецкай вобласці. Расійскія войскі нанеслі авіяцыйныя ўдары ў раёнах Фёдараўкі, Майскага, Дружбы і Нью-Ёрка. Ад артылерыйскіх абстрэлаў пацярпелі больш за 10 населеных пунктаў.
- На Аўдзееўскім напрамку вораг нанёс авіяцыйны ўдар у раёне Аўдзееўкі. Артылерыйскім абстрэлам падвергліся Новакалінава, Стэпавае, Бердзічы, Ластаўчына, Аўдзееўка і Першамайскае Данецкай вобласці.
- На Мар'інскім напрамку УСУ працягваюць стрымліваць наступ расійскіх войскаў у раёне горада Мар'інка.
- На Шахцёрскім напрамку праціўнік нанёс авіяцыйныя ўдары ў раёнах Старамаёрскага і Макараўкі. Здзейсніў беспаспяховыя спробы аднавіць страчанае становішча на захад ад Старамаёрскага і на поўнач ад Ураджайнага. Артылерыйскім абстрэлам падвергліся больш чым 15 населеных пунктаў.
- На Запарожскім напрамку вораг засяроджвае асноўныя намаганні на недапушчэнні далейшага прасоўвання УСУ. Праціўнік нанёс авіяцыйныя ўдары ў раёнах Гуляйполя, Малой Такмачкі, Новаданілаўкі і Пяціхатак Запарожскай вобласці. Артылерыйскім абстрэлам падвергліся больш за 15 населеных пунктаў.
- На Херсонскім напрамку праціўнік нанёс авіяцыйныя ўдары ў раёнах Атрадакаменкі і Антонаўкі. Артылерыйскім абстрэлам падвергліся больш чым 20 населеных пунктаў.
«УСУ працягваюць вядзенне наступальнай аперацыі на Мелітопальскім і Бярдзянскім напрамках, замацоўваюцца на дасягнутых рубяжах, ажыццяўляюць мерапрыемствы контрбатарэйнай барацьбы», — адзначылі ў Генштабе.
Украінская авіяцыя нанесла дзевяць удараў па раёнах канцэнтрацыі асабовага складу і ваеннай тэхнікі праціўніка і тры — па зенітна-ракетных комплексах. Таксама былі знішчаныя 9 разведвальных БПЛА аператыўна-тактычнага ўзроўню. Украінскія ракетчыкі і артылерысты пабілі 21 артылерыйскі сродак на агнявых пазіцыях, 1 радыёлакацыйную станцыю, 3 пункты кіравання, 1 раён канцэнтрацыі ўзбраення і ваеннай тэхнікі, 2 сродкі супрацьпаветранай абароны, 1 раён канцэнтрацыі асабовага складу і 2 склады боепрыпасаў.
Мінабароны РФ: знішчылі 38 беспілотнікаў, «Рапіру» і «Бук»
«Цягам сутак Узброеныя сілы Украіны працягвалі спробы наступальных дзеянняў на Данецкім, Паўднёва-Данецкім, Запарожскім, Купянскім і Чырвоналіманскім напрамках», — паведамілі ў Мінабароны Расіі.
— На Данецкім напрамку падраздзяленні Паўднёвай групоўкі войскаў у цесным узаемадзеянні з авіяцыяй і артылерыяй паспяхова адбілі восем атак праціўніка, пасля чаго контратакавалі яго і палепшылі становішча па пярэднім краі.
Страты праціўніка склалі да 380 вайскоўцаў, адзін танк, пяць баявых браніраваных машын, чатыры аўтамабілі, дзве самаходныя артылерыйскія ўстаноўкі Krab польскай вытворчасці, а таксама супрацьтанкавая гармата «Рапіра».
— На Паўднёва-Данецкім напрамку ўдарамі авіяцыі, агнём артылерыі і падраздзяленняў групоўкі войскаў «Усход» нанесенае паражэнне жывой сіле і тэхніцы УСУ ў раёнах населеных пунктаў Вуглядар, Прачыстоўка, Макараўка і Старамаёрскае Данецкай вобласці. Паспяхова адбітая атака праціўніка ў раёне населенага пункта Ураджайнае Данецкай вобласці.
Страты УСУ склалі да 175 вайскоўцаў, адзін танк, дзве баявыя браніраваныя машыны, два аўтамабілі, дзве артылерыйскія сістэмы М777 вытворчасці ЗША, а таксама гаўбіца Д-30.
— На Запарожскім напрамку актыўнымі дзеяннямі расійскіх падраздзяленняў, ударамі авіяцыі і агнём артылерыі нанесенае паражэнне праціўніку ў раёнах населеных пунктаў Арэхаў, Малая Такмачка, Новаданілаўка і Пяціхаткі Запарожскай вобласці.
Страты праціўніка склалі да 45 вайскоўцаў, два танкі, два аўтамабілі, самаходная артылерыйская ўстаноўка «Акацыя», а таксама гаўбіца Д-20.
— На Купянскім напрамку штурмавыя атрады Заходняй групоўкі войскаў вялі наступальныя дзеянні на шырокім фронце і занялі больш выгадныя пазіцыі ў раёнах населеных пунктаў Альшана, Першатраўневае Харкаўскай вобласці і Куземаўка Луганскай вобласці. Акрамя таго, паспяхова адбітая атака падраздзяленняў 25-й паветрана-дэсантнай брыгады УСУ ў раёне населенага пункта Навасёлаўскае Луганскай вобласці. Ударамі штурмавой авіяцыі і агнём артылерыі нанесенае паражэнне жывой сіле і тэхніцы праціўніка ў раёнах населеных пунктаў Сінькоўка, Петрапаўлаўка, Катляроўка Харкаўскай вобласці і Стальмахоўка Луганскай вобласці.
За суткі забітыя да 150 украінскіх вайскоўцаў, знішчаныя дзве баявыя браніраваныя машыны, тры аўтамабілі, самаходная артылерыйская ўстаноўка Krab, а таксама гаўбіца Д-30.
— На Чырвоналіманскім напрамку падраздзяленнямі групоўкі войскаў «Цэнтр», ударамі армейскай авіяцыі і агнём артылерыі паспяхова адбітыя дзве атакі праціўніка ў раёнах населеных пунктаў Новавадзяное і Чырвоная Дзіброва Луганскай вобласці. Падчас баёў забітыя да 30 украінскіх вайскоўцаў, знішчаная баявая машына пяхоты і бронетранспарцёр. Акрамя таго, нанесенае комплекснае агнявое паражэнне падраздзяленням УСУ ў раёнах населеных пунктаў Грыгораўка, Тарское Данецкай вобласці і Макееўка Луганскай вобласці.
Агульныя страты праціўніка на гэтым напрамку склалі больш за 110 вайскоўцаў, тры баявыя браніраваныя машыны, два аўтамабілі, а таксама самаходная артылерыйская ўстаноўка «Акацыя».
— На Херсонскім напрамку ў выніку агнявога паражэння забітыя да 30 украінскіх вайскоўцаў, знішчаныя пяць аўтамабіляў, а таксама гаўбіца «Мста-Б».
Удары расійскай арміі па тэрыторыі Украіны за суткі:
- аператыўна-тактычная авіяцыя, ракетныя войскі і артылерыя пабілі 97 артылерыйскіх падраздзялення УСУ на агнявых пазіцыях, жывую сілу і ваенную тэхніку ў 106 раёнах. У раёне населенага пункта Мемрык Данецкай вобласці знішчаная пускавая ўстаноўка зенітнага ракетнага комплексу «Бук»;
- сродкамі супрацьпаветранай абароны перахопленыя 11 рэактыўных снарадаў сістэмы залпавага агню HIMARS і дзве супрацьрадыёлакацыйныя ракеты HARM, знішчаныя 38 украінскіх беспілотных лётных апаратаў.
Ваенная разведка Вялікабрытаніі: Падлесак — адзін з фактараў павольнага развіцця баявых дзеянняў
Падлесак, які вырас на палях бітваў на поўдні Украіны — імаверна, адзін з фактараў, якія спрыяюць у цэлым павольнаму развіццю баявых дзеянняў у гэтым раёне, гаворыцца ў штодзённай зводцы ваеннай разведкі Вялікабрытаніі.
«Пераважна ворныя землі ў зоне баявых дзеянняў цяпер пакінутыя пад парай на 18 месяцаў, пры гэтым вяртанне пустазелля і хмызнякоў паскараецца ва ўмовах цёплага і вільготнага лета. Дадатковае прыкрыццё дапамагае замаскаваць расійскія абарончыя пазіцыі і абцяжарвае размініраванне мінных палёў», — мяркуюць у Мінабароны Вялікабрытаніі.
У разведцы дадаюць, што падлесак таксама можа служыць прыкрыццём для невялікіх прыхаваных атак пяхоты, таму абодвум бакам становіцца цяжэй прасоўвацца наперад.
Інстытут па вывучэнні вайны: УСУ наступаюць на трох напрамках і прасунуліся ў раёне Бахмута
Камандуючы паветрана-дэсантнымі войскамі (ПДВ) Расіі Міхаіл Цяплінскі абвясціў пра фарміраванне да канца 2023 года двух новых палкоў ПДВ і аднаўленне 104-й дывізіі, паведамілі аналітыкі Інстытута па вывучэнні вайны (ISW).
«Цяперашнія намаганні Расіі па фармаванні сіл, хутчэй за ўсё, прывядуць да ўкамплектавання новых фарміраванняў ПДВ ненавучаным персаналам, а не да набору дасведчаных байцоў, больш тыповых для гістарычнай эліты ПДВ», — мяркуюць эксперты.
Ключавыя высновы ISW:
- спрэчка паміж уплывовымі асобамі ў расійскай інфармацыйнай прасторы падкрэслівае адчувальнасць Крамля да паведамленняў пра няўдачы ў Крыме і, магчыма, ва Украіне агулам, і яшчэ больш выявіла недахопы ў супольнасці ваенкараў;
- расійскае вайсковае кіраўніцтва, імаверна, загадала блогерам не асвятляць праблемы, у якіх можна наўпрост абвінаваціць расійскае камандаванне;
- украінскія войскі працягвалі контрнаступальныя аперацыі як мінімум на трох участках фронту і, як паведамляецца, 2 жніўня прасунуліся ў раёне Бахмута.
- расійскія войскі вялі наступальныя дзеянні на рубяжы Купянск — Сватава, у раёне Крамянной, у раёне Бахмута, на рубяжы Аўдзееўка — Данецк.
Ва ўмовах ваенных дзеянняў мы не можам аператыўна праверыць дакладнасць звестак афіцыйных асобаў пра канфлікт. Любыя паведамленні праціўнікаў пра свае і чужыя страты варта ўспрымаць з пэўнай доляй скепсісу.