Заснавальнік «Еўрахіма» і Сібірскай вугальнай энергетычнай кампаніі Андрэй Мельнічэнка стаў лідарам рэйтынгу найбагацейшых бізнесоўцаў Расіі паводле версіі часопіса Forbes. Яго капітал ацэньваецца ў $ 25,2 млрд.
Мельнічэнка ўпершыню ўзначаліў гэты рэйтынг. Адзначаецца, што за год капітал мільярдэра вырас амаль удвая — адбылося гэта, паводле звестак журналістаў, у асноўным праз рост кошту «Еўрахіма», які займаецца вытворчасцю ўгнаенняў.
Летась Мельнічэнка займаў дзявятае месца сярод самых багатых расіян.
У сусветным спісе мільярдэраў паводле версіі Forbes Андрэй Мельнічэнка займае 58-е месца.
У сакавіку мінулага года ён назваў вайну ва Украіне трагедыяй і заклікаў спыніць яе.
«Рускі па нацыянальнасці, беларус па нараджэнні і ўкраінец па крыві, я адчуваю велізарны боль і разгубленасць, бачачы, як змагаюцца і гінуць брацкія народы», — сказаў мільярдэр.
Андрэй Мельнічэнка нарадзіўся 8 сакавіка 1972 года ў Гомелі ў сям'і выкладчыкаў, яго мама — украінка. Вучыцца ён з’ехаў у Маскву, пасля чаго застаўся жыць у Расіі.
